Молитва Иисусу Сладчайшему
Молитва
Владыко Господи Иисусе Христе Боже мой, иже неизреченнаго ради Твоего человеколюбия на конец веков во плоть оболкийся от Приснодевы Марии, славлю о мне Твое спасительное промышление, Иисусе, раб Твой, Владыко; песнословлю Тя, Иисусе, яко Тебе ради Отца познах, Иисусе; благословлю Тя, Иисусе, Егоже ради и Дух Святый в мир прииде, Иисусе; покланяюся Твоей, Иисусе, по плоти Пречистой Матери, таковей страшней тайне послужившей; восхваляю Твоя, Иисусе, Ангельская ликостояния, яко воспеватели и служители Твоего величествия, Иисусе; ублажаю Предтечу Иоанна, Иисусе, Тебе крестившаго, Господи; почитаю и провозвестившия Тя, Иисусе, пророки, прославляю апостолы Твоя святыя, Иисусе; торжествую же и мученики, Иисусе, священники же Твоя, Иисусе, славлю; покланяюся преподобным Твоим, Иисусе, и вся Твоя праведники пестунствую. Таковаго и толикаго многаго и неизреченнаго лика Божественнаго, Иисусе, в молитву привожду Тебе, всещедрому Богу, Иисусе, раб Твой, и сего ради прошу моим согрешением, Иисусе, прощения, еже даруй ми всех Твоих ради святых, Иисусе, изряднее же святых Твоих щедрот, Иисусе, яко благословен еси во веки. Аминь.